View site in Scots

Scots Language Centre Centre for the Scots Leid

Mither Tongue Recordit

25th November 2021

Weel kent braidcaster an screivar Billy Kay haes pit mou tae mic for tae bring us a recordit version o his kenspeckle wark Scots: The Mither Tongue. The Mither Tongue wis first set furth in 1986 whan the warna mony haundy warks anent the leid that wisna dictionars, an it haes been ootgien a puckle times ower the years. For thaim that daesna ken, this wark reenges the hail oreeginal an history o Scots, its sindry regional dialects, its clessic leetratur fae Barbour tae noo, an the contemporar poseetion o its community. An wi a puckle eiks an rewrites Billy brings us richt up tae date.

Kay belangs Ayrshire, but haes bade on Tayside for mony a year, an is weel acquent wi the sindry Scots braid Scotland. He threapit “Wi the interest in Scots warld wide noo, the audio book will help full a tuim void in fowk ayont Scotland’s kennin o the leid an hou it shuid be pronoonced. It will gie fowk a richer experience gin they hae the audio version an the text afore thaim as weel. Wha kens, mebbe it will stairt a Scots revival in a wheen fremmit airts discoverin the soonds o Scots for the verra first time.“

A body can get the recordit version o Scots: The Mither Tongue bi gait o Audible.co.uk online whaur fowk can sign up for a free shot for up tae 30 days.  The wark is echt houres an 15 meenits awthegither.

The’r a soond file o this story in Scots ablow.

The’r nae version o this story in Soothron.

 

  • Mither Tongue Recordit

    00:00