“Dinna deave a mither hamster,
Sooklin her young” ma bairnie’s pet buik said.
Bit Teenie, warm’s a bosie
Cuddly-cosie, Bambi-broon
Sae roly-poly teddy-beary saft as eiderdoon
We trysted, frae her bed.
Hished her awa wi gaitherins o grain
A train o wee temptations.

Nyaakit, her littlins wummled neth wir glower
An coored tae hear wir trumpetins ootower.

Neist morn, we powked wir yokky fingers roon her door
Yarkin the mither up-wirds tae explore
Syne cowked at yoam o carnage, nursery slaughter
Fur ilkie hapless, nyakit son an dochter
Lay quate’s a keekin glaiss. A heid
Linked sichtless, frae the wreckage o the deid.