Swack’s a puddock’s lowp, a bairn’s haun needs nae needle
Tae threid it a chyne o violets
Snippin in twa a boorich o primadonnas
Snod hi a raw.

A bairn’s neive, is a butterflee wi a bite
It’ll swype up a gowden buttercup sma’s a sip, frae the grun
Poor the sunlicht oot frae the petal’s trimmlin lip for a bittick fun
Young finggers raxx an grow like a linn o corn
Gyaun heelsowertip tae the mill
For Winter, Worry an Wirk, aa pleisurs kill.

A quine is bred tae flooer
Tae seed, tae dwine, syne dee, in the merriege booer.

Hinmaist, like a parten’s cleuks, beached i the fitenin air
Aa hauns bide quate
In the hairt o the quickenin mool forivermair,
Bruckle an blate.