Fur an flesh since cleekit on yon hull
A hinneypot, that predators pyked clean
Shines blae’s a nyaakit egg, the shriven skull
Dwines sterkly ben the jobby uplan girse.
Obscene. Twa boss, teem, bruckle spheres
Like caves o sichtless ivory
Gap fu an fixed intae some derk impasse
That skailed the braith frae yon cowped, luggit cup
A maitter o smaa moment
A thummelfu o cosmic ocean’s content.

The coral chaumer (inbye ’t betimes
The nestlin brain dird-dirded thocht)
Creaked on a brukken sneck.
A sweengin door, far somethin airy-vrocht
Hid breenged ben free an formless, left ahin a wreck
Nae langer pulsin in a hurtfu warld,
Leavin ahin a smile o bonnie, curved fite teeth
Finicky-strung like wampum roon the jaw
In n a mou dinged bare o braith
Booed scythe-like, on the hungry yird aneth.