Roon an roon the rugged rucks 
The rugged rascal ran *
The hoodie craw let oot a caw
Syne daunced a hoolichan

He wadna bide wi bawdrons
Nor puddock, sharny-green
He lowpit ower the lang rigs
An reestit on the breem

The rugged rascal bedd his lane
Ootower the barley brae
His heid it wis a boss neep
His queats war stooks o strae

He fleggit moose frae the corn
An dyeuckie frae the segg
Bi lettin oot a skelloch
Wad hae deafent Muckle Meg

An fin the meen cam ower the howe
Tae teet abune the park
The rugged rascal jinked until
The sparks flew oot his sark.

*These two lines are from a traditional Scots Bairn-Rhyme