A halflin quine caad Maisie Cotter
AY left her ferlies in a sotter
Her fooshty socks, her orra duddies
The verra drawers frae aff her hurdies
In ilkie airt frae stead tae stair
Played laldy wi the ozone layer

Her wallpaper wis clartit stoot
Wi bibblins frae her bubbly snoot
The gerbil, fa’d bin bynamed Ned
Hid biggit nests in Maisie’s bed
It thawed the fleer
An on a sudden,
It ett the duvet doon for pudden

Scunnert o reddin up her soss
An seen Maisie as a cross
They’d tholed ower lang,
Her ma an pa rose up ae day an ran awa
They hired a cooncil rubbish skip tae hurl Maisie tae the tip
Fa wadna dae as she was bidden.
Miss Maisie C  ... 
Address, “The Midden”.