Gritty, nutty, sheltie-broon
A guff o coffee lowps the yett
A furly, birly snake o rikk
Twines frae the kitchie, birsslin hett

Wersh in the mou, yon seerip, soor
Jeelip o potion fur a hoast
As nippy's ony crocodile
That slidders aff the Afrik coast

Draiglit wi daisies, droggt wi dyew
A tapsalteerie bout o hye
The cuttit girse cowpt ower the park
Yoams in the sunlicht doon the ley

A classroom thrang wi strang an swyte
Its brods are choked wi chacky stoor
Wi fooshty hose an clarty claes
The air catched in yon staa, is soor

Leather. A lick o linseed ile
Tae swacken hide an soople threid
Sae rich an roon the whiff o tan
On sheen an satchel, squirrel-reid

Fuskey's a thummelfu o flame
Kitties the queats an fires the face
Peat broon, or clear's a muirlan burn
That jibbles doon, like leddy's lace

Dulse is a stank o orra trock
Sea-midden slivers in a broth
O satt. Rank codgut sweels inby
A bree o putrefeein froth

Yird yarkit open bi the pleu
Yields up a yoam tae skirlin gulls
O Winter's daith, an Simmer's growth
Far breem reets mell like shipwrecked hulls

An gin I steek ma neb mang thyme
(Dried nippick o a mountain's braith)
The reef abune me dwines tae mist
The carpet, blooms wi fern, aneth.