Hoose-Warmin Sang
Tagalog (Phillipines)

Auld caimb, auld caimb,
Untaigle the raivelled thochts
O them wi'in, tae guid frae wirse
As ye've whyles caimbed ma hair
Fan yirdit wi dubs an girse,

May they fa cross this yett
Be pure in thocht
May they niver differ in ocht

Be smeeth's deep-rinnin watter
Calm's a nicht May-vrocht

Watter in the coggie
Be cweel's a widlan spring
Be still's an auncient Ben
Be saft's the eastern win
In the Simmer sizzen
That they aneth this reef
Be ayewis couthie an kind,
An open-lugged tae rizzen

Sweel oot the orra mou
Keep harns free o teint
Sae claik, daybrak tae gloam
Bring quate content.

Bleeze brichtly, licht
Hansel this hoose
Fleg shaddas awa
That derk thochts may takk flicht
Nae deave the fowk inby
Sikkin a bield ahin this waa

Licht the chikks, broos, heids
O the fowk that bide herein
Keep them an their bairnies' bairns
Free o stramash an din.