Oh tae be a salmon, comin skelpin doon the Dee!
Simmer scalin ower ma tail,
Lowpin through the linns,
Wummlin ower the rapids, i' the cauld, snaw bree,
An jinkin as the fishers wi ma fins.

I widna dauchle b' the banks,
Hob-nobbin wi the glegs,
Or coorie i' the puils abeen Braemar
I'd come breengin up oot-ower the whins
Like forty thoosan flegs;
Jist a skeely, skyty limmer,
Wi the shimmer o a star!

Syne, I'd turn aroon an up again
(I canna bide awa frae the bonnie watter
Birlin neth ma wame)

A salmon in its element, the heather an the faem,
A contermashious salmon winnin hame.