Luath Scots Learner
It wis twinty twa year syne this comin month, in Aprile 2002, that the first hail langage coorse in the Scots leid, in modren times, wis set furth. The Luath Scots Language Learner, wrutten bi Lindsay Colin Wilson, wis, an is yet, a haundy wark that haes intil’t aw the ordnar facts an airtans anent the leid an hoo it gaes thegither. At its oreeginal prent o 346 pages it haes 25 lessons, alang wi instances o twa-wey crack throu the leid, verb tables, advice on the gremmar, an mony, mony eiks an ends tae keep a body richt. But whit maks this parteeclar langage coorse kenspeckle, is the wey that Wilson sets the leid in hits cultural backgrund, wi sindry airticles anent the culture, history, leids an modren identity o the Scots fowk, whither its meat an maut, music, or politics. An jist as wi ither coorses o this ilk, the’r a CD o aw the twa-wey crack sae that a body can get hearin the leid an-aw. Sae if ye’r a body wantin a haundy coorse in Scots, that ye can stert oot wi fae hame, an tak in yer ain time, we doot this is the ane for you. For tae speir oot mair please clap yer device on the Luath www.luath.co.uk wabsteid.
The'r a soond file o this story in Scots abuin.
Doric Beet Camp
Fit wey’s the nae mair coorses throu Doric? This is the question that wis pit tae Dr Jamie Fairbairn, the heid o humanities at Banff Academy, an teacher o the Scots leid. Weel, efter speirin aboot a bittie, the affcome o this question wis the Doric Beet Camp, that is, a camp far fowk can spik naething but North-East Scots, ithergaits kent as The Doric. It’s nae jist for learners, but for fowk at’s versant an-aa an can gie ithers a bittie help.
Fairbairn an ither teachers fae Banff will be haein a wikkend o clesses in Doric, anent The Doric, an aa aboot the culture, that will run fae 5.30pm, on Seturday 5 July, throu until 2pm on Sunday 7 Jooly 2024. The clesses will be attendit bi bothy singer Dougie Hay, alang wi teachers Rebecca Logan, Stuart McClymont, an Aidan Robertson, an will be held in the Portsoy Sail Laft.
The price o the coorse is jist £20, wi ludgings offert tae fowk at’s comin a lang gait, but ony body wi an intress maun speir bi 31 Mey for tae mak sheer o the puckle places. Please clap yer device at www.facebook.com/DoricBootcamp for tae get mair wittins o this.
The'r a soond file o this story in Scots abeen.
Yum
Screivar Susi Briggs haes brocht oot a new buikie in Scots for afore-scuil bairns cryed Yum. It tells the story o a lassie cryed Jenny that’s awa tae hae her pieces in the gairden but ends up sharin them wi a moose, a coo, an a hairy oobit, an sae maks new freens. Susi commentit that she’s wantin parents an bairns tae see that Scots isna jist a spoken leid but is easy eneuch tae read aince a body taks a keek at the wrutten word. The buik haes been illustrate wi Charlotte Brayley that grundit the character o Jenny on her ain dochter.
The buik is set furth bi Foggie Toddle Books at £7.99, wi uphaud fae the Grant tae the Scots Leid, an the Buik Trust for Scotland. It will hae its offeecial ootset this month, an throu the ware, at a wheen o fests in the sooth wast o Scotland whan Susi will speak wi bairns an faimlies anent her wark. Onybody that’s ettlin tae order Yum noo shuid clap thair device on the wabsteid o www.foggietoddlebooks.co.uk whaur thay’ll can speir oot mair wittins.
The'r a soond file o this story in Scots abuin.
Facts is cheils
This week bygane, an as the affcome o a speir bi gait o freedom o information, the Scots Government haes lowsed feegurs anent the siller it wares on behauf o baith the Gaelic an Scots leids. In the spenning year 2023-24 the siller set aside for the Gaelic leid is £29,422,795.00 while for the Scots leid in the same year the siller is £553, 500.00. Sae faur, the siller wared on a Bill anent the Leids o Scotland, that’s in hauns the noo in Halyrood, is £24,009.49. Please clap yer device here www.gov.scot/publications/foi-202300377832/ for tae get the hail feegurs for baith the leids thir twa-three year bygane, or, for a mair pyntit brekdoun o the same.
The'r a soond file o this story in Scots abuin.
Ulster Braidcasting Fund
No lang syne the caw gaed oot for fowk wi deegital projects tae pit in tae the Braidcasting Fund for Ulster Scots. The fund wis estaiblisht for fowk ettlin at makkin deegital warks for baith hame aboot an ootland een, o aw ages, an in the scuils an oot. In pittin thegither sic warks, the makars o them haes been askit tae comprehend a mercatin plan anent social media for tae shaw hoo best thay can sell thair warks til a braid audience online. For ordnar, thaim pittin in for the fund maun be inrowed independent companies that’s steidit in Norland Irland. Amang the projects that’s gien uphaud bi gait o the Braidcasting Fund is ony warks that’s makkit throu the Scots o Ulster or haes muckle drawn fae its leetratur.
For tae get mair wittins o this, it is recommendit that fowk first speir at Heidi McAlpin, the Fund Executive (heidi@northernirelandscreen.co.uk), an syne a link tae the application form will be sent oot. Aw thaim pittin in for the fund maun first fill oot this form an eik ony documents sib tae the process. Please tak tent that the deidline for pittin in for the fund is Friday 19t Aprile 2024.
The'r a soond file o this story in Scots abuin.