Derry City an Strabane District Cooncil, alang wi uphaud fae the Agency for Ulster Scots, is awa tae haud a week tentie til Ulster Scots, baith spoken an wrutten, atween 25 an 29 November 2024. The cooncil wad like tae hear fae aw fowk or groups that’s versant in Scots whit kin kind o ideas micht best serr as a programme o haunling atween thae dates, whither in-person or deegital. Aw ideas is walcome an thaim that’s waled will be comprehendit amang the programme. Speakin anent this, Cooncillor Lilian Barr said that this wis a rare inlat for fowk tae come forrit an see that Ulster Scots is gien a heize, an, in parteeclar, for thaim that’s new tae Scots tae ken it better.

Please clap yer device here https://www.derrystrabane.com/services/ulster-scots/ulster-scots-language-week-2024 for tae get mair wittins o this or for tae pit forrit ony ideas that ye micht hae anent haunling.  Please tak tent that ye maun fill oot the form bi the deidline o twalhoures on Friday 20 September 2024.

The’r a soond file o this story in Scots abuin.

The theatre company Braw Clan, that stertit in 2023, an haes as its ettle plays throu the Scots leid, is awa tae pit on its second play. Braw Clan haes pit thegither a new drama cryed So Long, Wee Moon, wrutten bi playscreivar Martin Travers an directit wi Ros Sydney. Set in 1924, it haes as its backgrund the wey that the braidcast media stertit tae kittle the lugs o Scots fowk wi the soond system o Soothron fae thae days onwards, bi gait o the picture hoose, radio, an syne the televeesion. In the play, a faimly o weemen in Clydesdale warsles tae win ower in an affen unforgiein warld, uphaudin an skaithin ane anither as thay gae, an it’s scriptit throu baith the American Inglis an Scots leids. The characters o the weemen is played bi Helen McAlpine, Chiara Sparkes, an Morven Blackadder.

So Long, Wee Moon will be shawin in sindry places in Lanrikshire, throu September, stertin oot wi a first shawin at 7.30pm on Wadensday 18 September 2024 at the village haw in Crawfuirdjohn. Syne the play will gae aboot fae 20 September throu tae 28 September wi shawings at Biggar, The Leidhill, Wiston, Crawfuird, Roberton an Symington. The price o ingait will be left tae fowk on the nicht, tae pey at the skailing. Please clap yer device on https://brawclan.com/ for mair wittins o this, an the sindry dates an shawings.

Photie: Braw Clan

The'r a soond file o this story in Scots abuin.

The 2024-25 Improvement Fund for Publict Leebrars is noo open for applications. The fund, that’s admeenistert bi gait o the Leebrar an Information Cooncil for Scotland, on behauf o the Scots Government, gies siller tae new an oreeginal projects in leebrars braid Scotland that uphauds culture an community. This year, the fund looks the parteeclar gait o the Gaelic an Scots leids, alang wi biggin deegital projects. Awthegither the’r a fund o £450,000 an ony leebrar can pit forrit projects tae be conseedert that gies uphaud tae the communities that thay serr.

The deidline for pittin in for this fund is twalhoures on Wadensday 25 September 2024. Please clap yer device on https://scottishlibraries.org/funding/the-public-library-improvement-fund/ for get mair wittins o this or an online form.

The'r a soond file o this story in Scots abuin.

The Scots Opera Project, foondit back in 2014 bi David Douglas, haes pit oot a puckle productions throu the Scots leid an is noo awa tae pit on Dido an Aeneas that’s been owerset bi Dr Michael Dempster. Dido an Aeneas is an opera wrutten til a libretto bi the Inglis composer Hendrie Purcell (1659-1695) an haed its first kent ootset in Lunnon in 1689. It tells the story o Dido, the legendar queen o Carthage, that gaed gyte for the Trojan weirrior Aeneas, an is grundit on Buik IV o the Roman makar Virgil’s Aeneid, wrutten 2,000 year syne. The Scots Opera Project haes taen this story an noo set it in a mythic Celtic Scotland, tae be held in the Pitlochry Fest Theatre, an makkin uiss o performers fae hameaboot.

Dido an Aeneas will be shawin at the Pitlochry Fest Theatre on 31st August, an 1, 7, 8, 14 an 15 September 2024. Tickets is £25.00, but please clap yer device here https://pitlochryfestivaltheatre.com/whats-on/didoandaeneas/ for tae speir anent times, makkin a buiking, or ony ither wittins.

The'r a soond file o this story in Scots abuin.

It is 602 year fae the auldest kent document that wis baith wrutten in Scots an datit at Glesca. In 1422 George Cambeel, or Campbell, laird o Waster Gallystoun, wadset his lands o Gallisholme, in Ayrshire, tae Weelum Stirlin laird o Cadder. A wad is anither word for a pledge, sae for a body tae wadset til anither is tae pledge lands, or ither richts, in return for a lend o siller, on the unnerstaunin that the lands or richts wadset will be redeemed aince the siller haes been peyed back. In this case, George Campbell haed a lend o 20 merks Scots fae Weelum Stirlin an hechtit that he wad pey “in the hee kyrke o Glasgu, a pon the hee alter” an gree’d tae pey intress shuid the siller no be peyed back in time. Campbell pit his seal tae the wadset “at the cete o Glasgu” on 3 August 1422 for in thae days maist fowk cuidna write but raither pit thair seals in wax til a paper for tae shaw thay haed consentit. It is throu documents o this ilk that we can read an see the Scots leid as it wis, an is, in Glesca, doun tae this day.

Photie: Dr Dauvit Horsbroch

The'r a soond file o this story in Scots abuin.