Are ye a young body wi an intress in the Scots leid, an ettlin tae get yersel knackie? Weel, this month the’r a warkshop in makkin an writin Scots that’s airtit at younkers in secondar scuils atween S4 an S6. Cryed Me, Masel, and I: Findin Yer Ain Voice in Scots, the warkshop haes been pit thegither bi Jo Stevenson, co-airtar for Lare an Publict Programmes at the National Leebrar o Scotland, an heidit bi screivar Thomas Clark. Clark is wantin tae gie younkers a heize an bigg their skeels in wirkin throu the leid, but a body needna hae ony skeel o the leid tae stert wi, an awbody is welcome.

The warkshop will be held on Friday 23 Juin 2023, atween 2.30pm an 4.30pm, at the National Leebrar o Scotland, George IV Brig, Embra, an is free ingait.  Please clap yer device on https://www.eventbrite.co.uk/e/me-masel-and-i-findin-yer-ain-scots-voice-tickets-625168384467 for tae buik yersel a place.

Please speir at Jo Stevenson at J.stevenson@nls.uk for ony mair wittins o this haunling.

Photie taen bi Kat Gollock.

The’r a soond file o this story in Scots ablow.

Lang-time screivar, speirar an steerar, Dr Clive Young, a body that mony in the Scots warld will ken o, haes noo set furth a buik cryed Unlocking Scots that we doot will mak a rare read for aw thaim wi an intress in the culture an politics o the Scots leid.

Young taks his reader throu the whiles controvertit stauning o Scots, baith in bygane days, an noo, an speirs aboot langage ploys in time tae come. Abuin awthing, he speaks o the Scots leid as a gey important cultural tocher tae Scots fowk an jalouses that no aw the ploys gauin nooadays is necessar uissfae, but whither a body grees wi his threaps or no, this buik maun be regairdit as anither chuckie tae the cairn.

Unlocking Scots (ISBN 9781804250495) can be coft as a paperback oot o Luath Press, in Embra, for £16.99. Please speir at sales@luath.co.uk for mair wittins o this. The buik will hae its first offeecial ootset on Thursday 15 Juin 2023, at 2pm, in the National Leebrar o Scotland, George IV Brig, Embra, whaur Dr Young will speak anent his wark. For tickets please veesit the Luath hamepage an clap yer device on the link for Eventbrite.

The’r a soond file o this story in Scots ablow.

The Scots Leid Associe – kent in Soothron as The Scots Language Society – wis foondit in 1972 for tae forder and uphaud Scots screivings an leetratur. For fifty year it haes been pittin furth a journal cryed Lallans that haes intil’t sindry airticles wrutten throu Scots anent aw-kin-kind o subjects. In 2011 the Associe stertit pittin oot a newsletter cryed Eiks an Ens forby. Eiks an Ens haes news, wailings fae Lallans, an wittins anent jynin the Associe. Gin ye’r a body wi an intress in the leid please clap yer device on the hamepage o the Associe  ( https://www.lallans.co.uk/index.php/eiks-ens )  whaur ye’ll can dounlaid aw the Eiks an Ens newsletters as PDFs fae October 2011 onwards.

For a pree o the last ane, please tak a swatch o Eiks an Ens nummer 23 ablow.

The Scots Leid Associe – kent in Soothron as The Scots Language Society – wis foondit in 1972 for tae forder and uphaud Scots screivings an leetratur. For fifty year it haes been pittin furth a journal cryed Lallans that haes intil’t sindry airticles wrutten throu Scots anent aw-kin-kind o subjects. In 2011 the Associe stertit pittin oot a newsletter cryed Eiks an Ens forby. Eiks an Ens haes news, wailings fae Lallans, an wittins anent jynin the Associe. Gin ye’r a body wi an intress in the leid please clap yer device on the hamepage o the Associe  ( https://www.lallans.co.uk/index.php/eiks-ens )  whaur ye’ll can dounlaid aw the Eiks an Ens newsletters as PDFs fae October 2011 onwards.

For a pree o the last ane, please tak a swatch o Eiks an Ens nummer 23 ablow.

The Scots Leid Associe is haudin its yearly collogue an general gaithering this year at Saunt Mattha’s Kirk in Perth, on Seturday 3 Juin 2023, stertin at 10am an skailin for 4pm. Foondit in 1972, the Scots Leid Associe sets furth the journal Lallans, the langest-runnin journal in the warld tae the Scots leid.

The theme for this year’s ane is Flytin an the’r a wheen o speakers tae speak anent the subject an maiters sib, comprehendin J Derrick McClure, George T Watt, Fred Freeman, an Len Pennie.

Please speir bi gait o email at lallans@hotmail.co.uk for tae get mair wittins o this or anent the Scots Leid Associe in general.

The’r a soond file o this story in Scots ablow.