This week sees the anniversar o the Glenesk Quitclaim. It is noo 643 year fae Sir Alisaunder Lindsay o Glenesk gied oot his quitclaim on forty merks warth o land in favour o Dame Magret coontess o Mar, datit an sealt on 12 Mairch 1380 (or 1379 auld calcul). Tho we div hae John Barbour’s Brus fae aboot 1375 thon document wins ower as a 1487 dooble jist, but the Glenesk Quitclaim is the auldest full length document, aw in Scots, an in its oreeginal. For this reason aw thaim that hauds the Scots leid dear will dootless be keen o this document.

The’r a soond file o this story in Scots ablow.         

On Friday 27 Januar 2023, at 6.45, poyet Stuart Paterson will be haudin the first ootset o his new gaithery o poyems cryed Wheen. The houer lang haunling will be in the theatre o the Robert Burns Centre, Mill Road, Dumfries, an will be hostit bi reporter an screivar Giancarlo Rinaldi. For tae attend please clap on the link https://rbcfilmtheatre.co.uk/all-listings/wheenbooklaunch270123 whaur a body can buik free tickets.

The’r a soond file o this story in Scots ablow.

No lang syne Education Scotland an Oor Vyce ran a jynt project, fundit bi the Real Society o Embra, an cryed The Future of Scots, that’s ettle wis tae pit doun the foonds for biggin a langage policy tae the Scots leid grundit amang the community an aw thaim that’s airt an pairt. A speir amang the publict follaed, alang wi warkshops, an the affcome o this is a symposium tae be held ower ae day on 3rd Februar 2023 bi the Forum for Speirings anent the Leids o Scotland an Ulster (Forum for Research on the Languages of Scotland and Ulster). This will be pairtly held in person, tho places is scrimp, but the will be three sessions braidcast bi gait o webinar forby.

Please clap here https://www.eventbrite.co.uk/e/the-future-of-scots-symposium-tickets-511496980237 for tae get mair wittins anent the haunling an tickets bi gait o Eventbrite.

The’r a soond file o this story in Scots ablow.

Poyet Stuart A Paterson haes brocht oot a buik cryed Wheen: Collected and New Scots Poems that haes intil’t poyems wrutten atween 1992 an 2022, an set furth bi the Ulster Scots Community Network. Stuart will be pittin his haun o write til a puckle doobles o his wark for aw thaim that wants tae order the buik afore hit is lowsed offeecial like at the end o Januar 2023.

Please speir at Stuart bi gait o email stuartapaterson1966@hotmail.com for mair wittins o this an hoo tae order ane tae yersel.

The’r a soond file o this story in Scots ablow.

It’s fifty year fae Lallans wis first set furth, an for tae mark this the Scots Leid Associe haes brocht oot a buik o walings fae ower the years. Cryed Wunds That Blaw Sae Roch: 50 Years o Lallans Prose, the buik haes intil’t walings oot the wark o some fifty screivars, stertin wi JK Annand fae the first Lallans back in the 1970’s. Mony o the airticles haes been edit doun but the buik shaws whit ootgie o Lallans the airticle haes been taen fae sae that a body can awa an find the full oreeginal. The’r aw kin kind o subjects dealt wi here, fae history, tae maiters o langage an spelling, cutty stories, plays an owersettins, an comment anent lettert warks. For a body lookin for a guid pree o whit’s been wrutten throu Scots prose thir fifty year bygane this buik is a rare stert.

Wunds That Blaw Sae Roch haes been edit wi J Derrick McClure, Elaine Morton an William Hershaw, three weel kent bodies that’s been in aboot Lallans for mony year. The buik (ISBN 978-1-913162-19-1) is priced £12.99 an set furth bi Grace Note Publications, an can be coft bi gait o email lallans@hotmail.co.uk or throu the post at 61 Cliffburn Road, Arbroath DD11 5AB.

The’r a soond file o this story in Scots ablow.