No lang syne we haed the dowie wittins o the deith o Professor Manfred Görlach, in his echty-saxt year. Manfred wis born in Berlin, Germany, in 1937, an gaed tae the Free Versity o Berlin for tae tak coorses in the Soothron leid. In 1961 at the biggin o the Berlin Waw Manfred got liftit wi the East German Secret Polis for helpin ither students flee ower tae the Wast, an wis gien fower year in the jyle. Aince lowsed, he gaed back til his academic lare an got his PhD oot the Versity o Heidelberg in 1970. Syne, Manfred wis professor in the langage o the Soothron leid, an in lare anent the Middle Ages, steidit at the Versity o Cullen (Cologne / Köln) fae 1984 until his retiral in 2002.

At a time whan the Scots leid wisna quotit in its hame kintra, Manfred ran coorses anent the langage an history o Scots for his students ower in Germany. He wis tentie tae the growth o intress in Scots, in Scotland, throu the 1990’s, an wis kittled at the uiss o the leid in academic confeerences whaur afore he’d jaloused that naebody in modren times cared muckle for it. His mony airticles, buiks an ither warks, baith anent langage as a hail, an the Scots leid in parteeclar, will aye be treasured wi onybody wi an intress in this field, an sae his wa-gauin a dowie loss.

Photie: Manfred Görlach (richt) wi J. Derrick McClure an Dauvit Horsbroch in 2001.

The'r a soond file o this story in Scots ablow.

The Associe for the Leetratur o Scotland (Association for Scottish Literature) is awa tae haud an ae day scuils confeerence in Glesca offerein CPD in sindry brainches o langage an leetratur anent poyetry, film-makkin, novels, an screivings, in baith the Scots an Soothron leids. The ettles is tae gie uphaud tae teachers that’s yet in hauns wi training, alang wi forder advice anent thir subjects for ither teachers lookin thon gait.

The confeerence will be held on Seturday 7 October 2023, stertin at 10am in the Jeems Watt Sooth Bigging, Engineering Wey, at the Versity o Glesca, an will skail at 4pm.  Ingait is free. For mair wittins anent this please speir at Duncan Jones bi gait o email office@asls.org.uk or gie the depairtment o Scots Leetratur a phone on 0141 330 5309.

The'r a soond file o this story in Scots ablow.

Div ye hae an intress in maet an maut? Fa daesna? The Doric Quine is caain on fowk tae send her ony auld recipes that she michtna hae, alang wi ony crack, poyems an ither eiks an ens anent maet in North East Scots – ‘e Doric - tae ging alang wi them. She’s awa tae stert a crowdfunder for tae pit oot anither beukie o fowk’s favourite dishes. A body can either post them on the Doric Quine Facebook page or email them direct like tae folklore.quine@gmail.com far she wad be richt gled tae hear fae ye. A gweed hantle o the siller fae the beukie will be gien tae the The Willows Animal Sanctuary far peer beasts that’s been hurtit can get a bittie care. Sae gin ye hae a recipe at’s far ben, please lat the quine ken.

The'r a soond file o this story in Scots ablow.

Dictionars o the Scots Leid in Embra haes pit oot a caw for up tae fower jobs tae be fillt. The poseetions is peyed atween £24 an £28,000 a year, lippenin on the skeels an knawledge o the bodies taen on, an the contracts is for atween 12 an 18 month, wi a stert date o 15 Januar 2024. The Dictionars is awa tae chenge its online Aulder an Modren dictionars o Scots for tae mak them swacker wi aw kin kind o devices an graith, an tae redd the gait for eikin mair materials. The new  bodies taen on will mak up pairt o the team that will tak thir tasks in haun an wirk on sindry ither projects forby. The wark will be done maistly fae hame, bi gait o email, text an video, but wi antrin gaitherings for training or ither maiters, an can be done either full time (35 houres) or pairt time tae the wark pattren that’s fitting.

Gin ye hae an intress in pittin in for ony o thir poseetions, please see yer CV wi letter or email tae jobs@dsl.ac.uk bi the deidline o 22 August 2023. Mind that the CV mauna be mair nor twa pages an that yer letter or email maun state whit pattren an nummer o houers ye wad raither wirk tae. Thaim that maks the shortleet will be askit tae attend a first interview either in person or throu online graith.

The'r a soond file o this story in Scots ablow.