The peesie pipes her cloudy tune
Aroon the back o Bennachie
Far dockens dover, yeities cheep
Aa's growth, an wyvin greenery

A leprechaun his cast his quilt
Alang the dwaumin, Gordon howe
He's happit aa in elfin green
Frae sheugh, tae fairm-toun, tae knowe

A hippit yowie hirples by
A dauncin gleg nips at her dowp
The ootraxxed finggers o an aik
Drap shaddas, far the rabbits lowp

The sharny kye ayont the dyke
Like claikin gossips, boorich roon
Hoch-heich in clover. Wabbit wives
They're plottit, birsslin hett, at noon.

A forest plaid o bronze fir-preens
Furls saftsome ben a futterat's trail
Abune green-luggit blaeberries, teet
Twa lums, the hornies o a snail.

Tap seelie braes, the rowans bide
Their waddin blossom's fite's the snaw
An reeshlin ben ilk leafy bride
The bonnie, birlin, breezes blaw.

The drouthy breem drinks doon the sun —
Hett bummers heeze tae pree its gowd
Like butteret wings, smaa hauns in prayer,
Breem flooers, like yalla muirmochs showd

The peesie pipes her cloudy tune
Aroon the back o Bennachie
Far dockens dover, yeities cheep
Aa's growth, an wyvin greenery.