Charles Middleton born Aboyne 1907, died Aberdeen 1988
Dwined till a dwaum yon moss-green kindly een,
His sang that raise as a shout
Fin his warld wis young, crined till a myowt
Late, fin his reel ran deen.
The barfit loon that bed in the auld man's skin
Wid lowp like a bawd clean mad tae rin
Hyne back, swack fur a swippert morn
Fin soun an taste an sicht,
War green as brierin corn
An friens war flesh an bluid,
Nae thochts forlorn.
The airm aince braid's a branch
Dweebled, a shakkin sheaf.
The haun that gentled ma bairnhood,
Drappit, a tummlit leaf.
I cudna kep his step,
Tho the road he wauked grew roch
The burn maun rin its lane,
Till it reests i' the loch.
Fowk saw a gutterin caunle,
Bauchled sheen an claes.
I saw a guidin licht,
Frae the bairntime o ma days
Garrin me ken the wirth,
O beauty in brae an cloud ....
I luiked on an auld deen man,
An I saw gowd.
Related Audio and Video
Scots Language Resource Centre Association Ltd. t/a Scots Language Centre, A.K. Bell Library, York Place, Perth, Scotland PH2 8EP
Registered in Scotland as an Industrial & Provident Society No. 2451R(S). Scottish Charity No. SCO21747
Scots Language in Scotland's Census 2011 | Shetland and Orcadian Scots dialect | Caithness Scots dialect | North East Doric Scots dialect | East central Scots dialects | Angus and Tayside Scots Dialect | Galloway Scots Dialect | West Central Scots Dialect | Borders Scots Dialect | Ulster Scots Dialect | Scotch language | Scots leid | Scottish Language | Ulster Scots Dialect |