Suz Sinclair
Suz Sinclair! – Ou! – Sourocks! Wormwood! Ga’!
A nippy, nebby, thrawn and spitefu’ limmer!
Sic things as her sood be against the law,
For whatna mortal ootrage is there grimmer?
A crooket, crabbet,
Nesty-gabbet,
Bleary, blinkin’,
Evil-thinkin’,
Leein’ tinkler
Is Suz Sinclair!
Suz Sinclair! – Ouch! – Nettles! Thistles! Jags!
A stangin’, wrangin’, constant toon’s affliction!
O, wae the day they stoppet burnin’ hags,
And set black magic doon as but a fiction!
For breedin’ rancour,
And spreadin’ canker
Is jist black magic!
O, it’s tragic,
To spare this tinkler
Hag, Suz Sinclair!
Suz Sinclair! – Feich! – Ether! Whaisle! Taid!
She sees some ill where only guid is hidden;
O’ clartin’ characters she mak’s a trade,
And lassies’ names reek on her foulest midden!
A sneerin’, jeerin’,
Interferin’,
Clashin’, claiverin’,
Slimy, slaverin’,
Tattlin’ tinkler
Is Suz Sinclair!
Andrew Dodds (b.1872)
Selected by the Scottish Poetry Library
CLICK HERE TO DONATE Sign up for the Scots Language newsletter and keep up to date
Supported by
Supporters of
SLC, A K Bell Library, York Place, Perth, PH2 8EP P:(44) (0) 1738 440199 F:(44) (0) 1738 477010 E:info@scotslanguage.com | Terms & Conditions | Un-subscribe | Login
Scots Language Resource Centre Association Ltd. t/a Scots Language Centre, A.K. Bell Library, York Place, Perth, Scotland PH2 8EP
Registered in Scotland as an Industrial & Provident Society No. 2451R(S). Scottish Charity No. SCO21747
Shetland and Orcadian Scots dialect | Caithness Scots dialect | North East Doric Scots dialect | East central Scots dialects | Angus and Tayside Scots Dialect | Galloway Scots Dialect | West Central Scots Dialect | Borders Scots Dialect | Ulster Scots Dialect | Scotch language | Scots leid | Scottish Language | Ulster Scots Dialect |