Chorin Stanes...

Posted by

Hello aw, howp ye hae aw been fine this hinmaist week. I'm nippin out in a bit, sae jist time fer a wee blog this week

I hae been feil thrang, I can tell ye that. Syne I'll be daein Scottish History at Uni in September, I decidit tae get a heid stairt a while back an read aw the Scottish history buiks I cuid get ma hauns on. Nou, its intressin stuff, I can grant ye thon, but its no hauf haird gaein at twa in the mornin!

Wi thon in mind, I tuin a day aff frae heivy readin yesterday an read throu Ian Hamiltons "The Taking of the Stone of Destiny". It wis a quick read, but boy wis it a guid ane. I jalouse ye aw ken the story by nou, its awmaist pairt o wir naitional fowklair the nou; nanetheless, I'd recommend the buik tae aw Scots fowk. The hail thing's a wul rollercoaster an nae dout! It seems the fower yung heroes cuidna gae twa meinutes but rinnin intae the polis - an whit wi car saets, campin gypsies an snawy gates the hail thing comes aff as a true modren adventure o the heichest order. Absolutely braw; an ye needna gree wi aw o Hamilton's thochts tae enjoy the story o ane o wir kintra's cheekier victories.

An nou ontae the nae less important but sumwhit less inspiring maitters o the intricacies o the fuedal seistem...

The ithir Lumsk album I ordered cam throu this week. It's cried "Det Vilde Kor" (The Wul Choir), wi the leirics taen frae a buik o poems o the samyn name by the Norrowegian makar Knut Hamsun. It cuid aiblins be a bit mair metal nor in fack it is; but the melodies is bonnie, there's a guid rainge o styles kivvered, an it's in the end a no bad follae up tae "Troll."

Sang o the Week : The Beatles - In My Life. Bonnie sang, that.


God Bless,

Dunc

blog comments powered by Disqus

The opinions expressed here are the views of the writers and commentators and do not necessarily reflect the views and opinions of the Scots Language Centre