Estate agents in fremmit airtins, an a challenge
Hello aw, walcome tae this week's blog.
It's a raither dreich day in Edinburgh the nou, tho yesterday wis braw, sae braw in fack, that whan Michael an I met wi ilk ithir up toun fer a wee chat anent the SLC we waled tae sit outbye in the sun.
We blethered anent twa-thrie things, includin sum projecks fer the site that wull be comin alang suin, pendin gettin the richt equipment. I'll no be gaein intae muckle mair detail the nou, but suffice tae sae I ne'er thocht I'd be spendin time reingin Faeroese estate agent wabsteids...haein said thon, the amount o times Scotland get drawn wi thaim in the Euro Qualifiers I micht as weil buy masel a hous there!
Spaekin o fitbaw, there's guid news this week - thanks tae the humahudie wey o dealin wi siller an accounts at Gretna, Airdrie haes been pit intae the First Division. Ya dancer! We maun bigg wir squad, but wi guid curn o players I jalouse we micht haud wir ain, an at least evyte relegation. The first division sulg be guid fer thrangs this season comin - Plastic Whistle, Morton, Dunfermline...sum guid rivalries in there an aw.
Talk o fitba's gied me a wee norrie: gien a challange tae aw that reads this blog. Gae ontae the Scots Wikipedia (http://sco.wikipedia.org/wiki/ ) an pit up a wee (or so sae wee) airticle anent yer team. There's no monie guid airticles anent fitbaw teams on there the nou - maistlins jist an infobox an a sentence sayin whaur they plays their hame gemmes. E'en jist settin ower a bittie frae the Inglis Wiki airticle wad impruive the Scots site nae end. Wha's up fer it?
Weil, I maun awa the nou, but keip yersels weil an daena ocht I wadna dae! Mair o ma haivers neist Friday.
Sang o the week - "Death and the Healing" by Wintersun.
God bless ye aw,
The opinions expressed here are the views of the writers and commentators and do not necessarily reflect the views and opinions of the Scots Language Centre
Scots Language Resource Centre Association Ltd. t/a Scots Language Centre, A.K. Bell Library, York Place, Perth, Scotland PH2 8EP
Registered in Scotland as an Industrial & Provident Society No. 2451R(S). Scottish Charity No. SCO21747
Scots Language in Scotland's Census 2011 | Shetland and Orcadian Scots dialect | Caithness Scots dialect | North East Doric Scots dialect | East central Scots dialects | Angus and Tayside Scots Dialect | Galloway Scots Dialect | West Central Scots Dialect | Borders Scots Dialect | Ulster Scots Dialect | Scotch language | Scots leid | Scottish Language | Ulster Scots Dialect |