Mair blethers

Posted by

Hello, hello, me again.

Howp ye'r aw bearin up unner the wecht o wunter caulds, the joys o Christmas shoppin an Slade as weil as I am masel. That's the first semester o Uni out the wey the nou, an I dout it's gaed richt weil. Scottish Ethnology's been braw - I did a thrie thousan wurd essay on the Kirkwall Ba', an whit haippens but the SLC pits up a helpfou wee veidio aw about it!... a week EFTER I haun the thing in!

I'm leukin forrit tae neist year, an hae been daein sum wark for a new feature that we howp wull kythe on the site early in 2009 baurrin onie technical fankles. I suld aiblins be daein mair wark on the that the nou...

I ralley maun awa the nou, but jist ere I dae, ye micht like tae ken that St. Giles Cathedral on the Royal Mile nou haes it's veisiter guide in Scots, owerset by yers truly. The wifie that rinns that side o the kirk telt me that a guid monie fowk hae bocht copies (ainlie 20p) an that the guides wis rale blythe whan it cam in. It's richt there on the information-buird alang wi French, Catalan an aw the ithirs. This micht be sumthin warth daein mair o, fowk. It disna tak a muckle darg tae gae sumwhaur, tak a guide leaflet an owerset it. Email it tae the fowk that rin the place, the warst they'll say is "na." It's no as impressive or important a wark as Mr. Donati's braw owersettin o the Declaration o Human Richts, but it's anithir chuckie on the stane, an aiblins it'll prod anithir bodie intae action sumwhaur.

Cheerio for the nou, an gin I dinna get on ere then, hae a Merry Chirstmas an a braw Hogmanay

God Bless,
Dunc


Sang o the Week : Windir - Destroy. Braw keyburid wark in this sang aff the 1184 album.

blog comments powered by Disqus

The opinions expressed here are the views of the writers and commentators and do not necessarily reflect the views and opinions of the Scots Language Centre