Bloggers
Buiks, fitbaw an ithir blethers
Posted by: Duncan
16 May 08 - 06:10
Hello aw, I howp ye hae aw been weil this week past.
Gin ye byde in Edinburgh, ye cuid hae duin waur this week nor poppin intae St. Andrew's an St. George's Kirk on George Street tae tak a keik at the Christian Aid Buiksale. This finisses the day, haein staritit on Monday, an is a braw wey tae spend a lot time an no a lot o siller.
There wis sum Scots buiks there (a puckle fewer efter I haed been there nor afore) - maistly poetry an a hantle copies o Lorimer's New Testament. In fack, I picked up a copy tae send tae a frein o mine in Finland an an aulder cheil cam up tae me an stairtit bletherin awa about whit a braw buik it is - In Scots, o course.
He telt me that he uissit tae wark at the kirk, an wad whiles pit swatches frae the Scots New Testament on the buirds on the outer waws fer fowk passin by tae read. Maistly fowk wis positive anent this, tho he telt me he aince heard an aulder cheil manin that ''That's no hou the Bible wis wrutten doun.'' Na, I hear St. Paul wis weil kent fer his skeilly uisse o 17t Century Inglis!
On tae the rest o week, it wes a wee bit o a shame tae see Rangers get beat in the UEFA Cup Final, tho no nearly sic a shame as tae see the cairry on o sum o the fans wi the polis! I'm no a Rangers fan ava, but gin they'd won it wad hae gied Scottish fitbaw a guid heeze. Ach weil, nae dout the players wul hae picked up guid experience that they can cairry intae the naitional team's qualification campaign fer the Wurld Cup.
That, o course, is a wee wey aff, an fer ma team, Airdrie United, the season's ower. We didna win in tae the first diveison, tho gin Gretna fauld (as enspecktit) we cuid be up on a technicality. No a nice wey tae dae it, but wad it no be ironic fer Airdrie tae win a better place in Scottish fitbaw thanks tae Grenta's daith?
An nou tae settle intae the lang simmer o fitbaw-less Saturdays...I'm shair sum gairdenin'll be duin. Hooray.
Tip o the week - Check out Korpiklaani on YouTube. Nou there's a braw band; heich octane fowk-metal - aw in guid speirits an a guid avalanche o fiddle an accordion gies it a heize that gars e'en non-metal fans like thaim. Tap yer fit or band yer heid, it's guid stuff.
God Bless ye aw, an come back fer mair blethers neist week,
Dunc
Latest posts
This is sumthing I hae been ettlin tae pit up for wee while, but jist no got roun tae. It's jist a wee hanlte o wurds that I hear yung Edinburgh f...
YA DANCER! Ther's monie wurds in Scots that we aw luve, that's mair expressive (tae us) nor their Inglis equeivalents - dreich, snell, braw, cra...
Hello aw, howp ye ar aw daein weill an managed tae survive the hinmaist week wiout a blog frae me tae keep ye gaein. I micht be awa up tae the hei...
Hello aw, howp ye's daein weil. I stairtit readin David Lindsay's "Thrie Estatis" the ithir day, certaint ane tae be recommendit tae aw fowk (...
Hello aw, how ye hae been makkin the maist o this...this...simmer? Na, that's no the wurd, canna be... Ah, weil - I howp ye hae been makkin the ma...
I'm awa hame tae ma mither and faither's hoose fir a day or twa, and I dinnae ken if the Internet is richt plumbed in thereabouttes, sae dinnae fas...
Heya aw, howo ye'r aw daein weil. I hae faimily comin up frae Kendal the day, sae the hous is aw in an affy fankle an I ainlie hae time for a ...
Whit d'ye mak o this? - http://www.iht.com/articles/2008/07/03/asia/03ainu.php Thir's ae braw line, juist at the end, that gar me lauch out l...
Hello aw, howp ye hae been makkin the maist o wit braw simmer...or the twa-thrie braw hours we hae been gettin. Michael wis sayin this wad be the ...
Ma wee lassie, wha's no lang tirnt five, has jist startit lairnin tae scrieve in jined-up letters at the scaill. "En attaché", they cry it here in...