The SLC merks Burns Nicht this year wi a mindin o whitna lang wey the Scots leid has cam in the last quarter century.

This is forbye a preein o a important projeck that the SLC is gaun tae host, makkin available online the Collected Writings on the Scots Language o the late Jack Aitken, a yin-man Scots Langage Resource Centre in his ain day!

The collection includes aa Jacks seminal papers on Aulder Scots, descreeptions o the philosophy an methods o A Dictionary of the Older Scottish Tongue, accoonts o his thinkin on the continuum atween Scots an Scottish Staundart Inglis, thochts on the status o the modren leid, an airgiements for mair inclusion ot in eddication an the braidcast media, durin whit was maybes its lawest pynt.

There a puckle blauds that hasna kythed in prent afore, includin Jacks notandums on Hielan Scots, an autobiographical accoont o his ain university eddication an early career, an his lang haun-oot on the sources o Scots vocabular, that some frosty-powed Embro graduates micht hae mind on.

Amangst the no-afore-prentit maitter is this Address and toast to the Immortal Memory of Robert Burns fae 1990. Fae that time tae this, the struggle for the leid has whiles been a sair fecht, bit this mindin o foo the leid was negleckit an disregairdit no lang syne is a richt guid-willy encouragement that it will bear the gree yet.